מִזְמוֹר לְדָוִד הָבוּ לַאֲדֹנָי בְּנֵי אֵלִים
הָבוּ לַאֲדֹנָי כָּבוֹד וָעֹז
הָבוּ לַאֲדֹנָי כְּבוֹד שְׁמוֹ
הִשְׁתַּחֲווּ לַאֲדֹנָי בְּהַדְרַת קֹדֶשׁ
קוֹל אֲדֹנָי עַל הַמָּיִם
אֵל הַכָּבוֹד הִרְעִים
אֲדֹנָי עַל מַיִם רַבִּים
קוֹל אֲדֹנָי בַּכֹּחַ
קוֹל אֲדֹנָי בֶּהָדָר
קוֹל אֲדֹנָי שֹׁבֵר אֲרָזִים
וַיְשַׁבֵּר אֲדֹנָי אֶת אַרְזֵי הַלְּבָנוֹן
וַיַּרְקִידֵם כְּמוֹ עֵגֶל
לְבָנוֹן וְשִׂרְיֹן כְּמוֹ בֶן רְאֵמִים
קוֹל אֲדֹנָי חֹצֵב לַהֲבוֹת אֵשׁ
קוֹל אֲדֹנָי יָחִיל מִדְבָּר
יָחִיל אֲדֹנָי מִדְבַּר קָדֵשׁ
קוֹל אֲדֹנָי יְחוֹלֵל אַיָּלוֹת וַיֶּחֱשֹׂף יְעָרוֹת
וּבְהֵיכָלוֹ כֻּלּוֹ אֹמֵר כָּבוֹד
אֲדֹנָי לַמַּבּוּל יָשָׁב
וַיֵּשֶׁב אֲדֹנָי מֶלֶךְ לְעוֹלָם
אֲדֹנָי עֹז לְעַמּוֹ יִתֵּן
אֲדֹנָי יְבָרֵךְ אֶת עַמּוֹ בַשָּׁלוֹם