הללויה ♫

הַלְלוּיָהּ
הַלְלִי נַפְשִׁי אֶת-אֲדֹנָי
אֲהַלְלָה אֲדֹנָי בְּחַיָּי
אֲזַמְּרָה לֵאלֹהַי בְּעוֹדִי
אַל-תִּבְטְחוּ בִנְדִיבִים
בְּבֶן-אָדָם שֶׁאֵין לוֹ תְשׁוּעָה
תֵּצֵא רוּחוֹ, יָשֻׁב לְאַדְמָתוֹ
בַּיּוֹם הַהוּא אָבְדוּ עֶשְׁתֹּנֹתָיו
אַשְׁרֵי שֶׁאֵל יַעֲקֹב בְּעֶזְרוֹ
שִׂבְרוֹ עַל-אֲדֹנָי אֱלֹהָיו
עֹשֶׂה שָׁמַיִם וָאָרֶץ
אֶת-הַיָּם וְאֶת-כָּל-אֲשֶׁר-בָּם
הַשֹּׁמֵר אֱמֶת לְעוֹלָם
עֹשֶׂה מִשְׁפָּט לָעֲשׁוּקִים
נֹתֵן לֶחֶם לָרְעֵבִים
אֲדֹנָי מַתִּיר אֲסוּרִים
אֲדֹנָי פֹּקֵחַ עִוְרִים
אֲדֹנָי זֹקֵף כְּפוּפִים
אֲדֹנָי אֹהֵב צַדִּיקִים
אֲדֹנָי שֹׁמֵר אֶת-גֵּרִים
יָתוֹם וְאַלְמָנָה יְעוֹדֵד
וְדֶרֶךְ רְשָׁעִים יְעַוֵּת
יִמְלֹךְ אֲדֹנָי לְעוֹלָם
אֱלֹהַיִךְ צִיּוֹן לְדֹר וָדֹר
הַלְלוּיָהּ